"Қонақ келсе - құт келер".
Қонақжайлық - қазақ халқының дүниетанымының көрінісі, көнеден келе жатқан игі дәстүрі, атадан калған асыл мұрасы. Казақ даласында болған көптеген саяхатшылар атап кеткендей меймандостық ғұрпының негізі - "біздің барлығымыз - бұл өмірде қонақпыз" деген өмірлік ұстанымының көрінісі. Меймандостық - көшпенді өмір тұрмысында өмір сүрудің этикалық заңы болған, ата-бабамыз мұра етіп қалдырған қасиетті салт, дүниетаным бейнесі. Көшпенділер Мейманның жүзінен бейбітшілік хабаршысын, Тәңірінің қалауын жеткізер елшіні, қала берді, кезбе туысын - өзін таныған. Мейманды жылы шыраймен құшақ жая қарсы алып, құрметін көрсете отырып, өзінің де болашақ Мейман ретіндегі мәртебесін айқындай түседі…
(Бақыт Қайырбековтың "Қазақи этикет" кітабынан)
